Yn De Kanselarij fûn op 29 oktober de earste sesje plak fan it Begeliedingstrajekt Green Key/ Blauwe Flach fan Toerisme Alliânsje Fryslân en it Interreg-projekt WaddenVisie, yn gearwurking mei Stifting KMVK en Green Leisure Group. Tidens dizze sesje makken ûndernimmers kennis mei de ynternasjonale duorsumheidskeurmerken Green Key en Blauwe Flach: ynstruminten dy’t bedriuwen helpe om struktureel en sichtber te ferduorsumjen.
“It heljen fan in keurmerk is gjin doel op himsels, mar in helpmiddel yn de oergong nei duorsum ûndernimmerskip,” beklamme duorsumheidsadviseur Marco Ouwerkerk. Tegearre mei Robin van Milligen begeliedt er de Fryske ûndernimmers yn in trajekt fan fiif byienkomsten dêr’t tema’s as enerzjy, sirkulariteit, keatenskeakel-ferantwurdlikens en kommunikaasje sintraal steane.
Urginsje en kânsen foar ûndernimmers
Tidens de sesje waard ynzoomd op de needsaak om te ferduorsumjen. Klimaatferoaring, fersmoarging en ferlies fan biodiversiteit hawwe direkte gefolgen foar de toeristyske sektor. Wetteroerlêst, hjittestress en minder wetterkwaliteit foarmje risiko’s dy’t ûndernimmers twinge om foarút te sjen. Tagelyk biedt ferduorsuming ek kânsen: “Wa’t no ynset op enerzjybesparring, fergriening en earlike keatens, makket syn bedriuw takomstbestindich.”
Green Key en Blauwe Flach as liedraad
De keurmerken Green Key (foar ûnder oaren hotels, kampearterreinen en rekreaasjebedriuwen) en Blauwe Flach (foar strannen en jachthavens) binne beide ynternasjonale programma’s fan de Foundation for Environmental Education (FEE). Yn Fryslân binne yntusken 58 Green Key-bedriuwen en 33 Blauwe Flach-lokaasjes aktyf. De sertifisearrings helpe ûndernimmers om harren duorsumheidsynspanningen te strukturearjen, meiwurkers te belûken en gasten bewust te meitsjen fan miljeufreonlike keuzes.
Tegearre wurkje oan in griener Fryslân
It begeliedingstrajekt Green Key/ Blauwe Flach bestiet út fiif ynhâldlike sesjes, wêrfan de earste en lêste live plakfine. De tuskenlizzende byienkomsten binne hybride, sadat ûndernimmers ek digitaal dielnimme kinne of mei kollega’s yn De Kanselarij oanslute kinne. Underweis steane de adviseurs fan de Green Leisure Group klear as helpdesk en kinne dielnimmers ûnderfiningen en tips útwikselje.
Mei dizze searje set TAF in wichtige stap rjochting in duorsumer toeristysk Fryslân, dêr’t natuer, ûndernimmers en besikers yn balâns byinoar komme.
Mooglik makke troch it projekt WaddenVisie
It projekt “WaddenVisie” wurdt útfierd yn it ramt fan it INTERREG-programma Dútslân-Nederlân en wurdt mei-finansiere troch it Europeesk Fûns foar Regionale Untjouwing (EFRO) en de Nedersaksyske Staatskanzlei, lykas troch de provinsjes Fryslân en Grinslân, ûnder begelieding fan it programmabehear fan de Eems Dollart Regio (EDR).
